शापच आहे मला संगमरवरांत स्वप्न
लपवून ठेवण्याचा.
पांडुरंगाच्या चरणाला प्रक्षाळण करणारी
चंद्रभागा मी पाहिली नाहीं, आत्मसंवादाची
हीच प्रचीति आली माऊलीच्या उरावर
पाय ठेवतांना.
शापच आहे मला संगमरवरांत स्वप्न
लपवून ठेवण्याचा.
प्राणांचें मोल देऊन मुक्ति विकत घेत
असतों मी ; देहूच्या बाजारांत अभंग
विकणाऱ्या तुकारामाप्रमाणें - शापच आहे
मला संगमरवरांत स्वप्न लपवून ठेवण्याचा.
चाहुलवेड्या वाटुलीच्या प्रतीक्षेत चरणगंधाच्या
स्मृतीचें फूल उमलतांना पाहिलें नाहीं मी,
वाचली नाहीं सांद्र तमगारांत काजव्यानें
रचलेली प्रकाशगाथा ; पण फुटलेल्या
डोळ्यांच्या नीरांजनांत तुला ओवाळणारी शिळा
पाहिली आहे रे....
शापच आहे मला संगमरवरांत स्वप्न
लपवून ठेवण्याचा.
कोणत्याही टिप्पण्या नाहीत:
टिप्पणी पोस्ट करा