घनु वाजे घुणघुणा

घनु वाजे घुणघुणा ।    वारा वाजे रुणझुणा ।
भवतारकु हा कान्हा ।    वेगीं भेटवा का ॥१॥

चांदु वो चांदणे ।    चांपेवो चंदने ।
देवकीनंदने ।    वीण नावडे वो ॥२॥

चंदनाची चोळी ।    माझे सर्व अंग पोळी ।
कान्हो वनमाळी ।    वेगीं भेटवा कां ॥३॥

सुमनाची सेज ।    सितळ वो निकी ।
पोळे आगीसारिखी ।    वेगीं विझवा कां ॥४॥

तुम्ही गातसां सुस्वरे ।    ऐकोनि द्या उत्‍तरे ।
कोकिळें वर्जावें ।    तुम्हीं बाईयांनो ॥५॥

दर्पणी पाहतां ।    रूप न दिसे आपुलें ।
बाप रखुमादेवीवरें ।    विठ्ठलें मज ऐसें केलें ॥६॥


रचना    -    संत ज्ञानेश्वर
संगीत   -    पं. हृदयनाथ मंगेशकर
स्वर     -    लता मंगेशकर
राग      -    बागेश्री