~ हा नशेचा 'फास' आहे ~

सांजवेळी सोबतीला 'जी' मिळे 'ती' खास आहे
ब्रांड सारे सोड वेड्या लागलेली प्यास आहे !

सांज होता पाय माझे ओढताती 'त्या' दिशेने
काय सांगू काय होते सोडवेना 'त्रास' आहे.

सांजवेळीची नशा रे रात होता पेट घेते
जीव लागे टांगणीला, तीच माझा श्वास आहे

खोल आता बाटली ती, 'वाट' का रे लावतो तू ?
मी अताशा ढोसण्याचा घेतलेला ध्यास आहे !

काय झाले घाबराया, घे सुखाचा घोट आता
बायको नाहीच लेका 'जे' दिसे तो भास आहे !

सांज झाली, रात झाली, चेतल्यारे भावना या
ती रिकामी, मी रिकामा, हा नशेचा 'फास' आहे


कवी - रमेश ठोंबरे