नावात काय आहे ?

का आग्रह ? रसिका ! नाव सांग मज म्हणसी ?

नावात मोहिनी भासो सामान्यासी !

घननीलमणिप्रासादचंद्रशालांत,

ते असंख्य सुंदर तारे चम्‌चम्‌तात,

अनिवार इंद्रजालाते-टाकिती,

वसुधेस मंत्रमुग्धते-भ्रमविती,

संगूढ नेत्रसंकेते-वाहती,

हे विलास हरिती वस्तुजातह्रदयासी,

वद ! त्यांची नावे काय पुसाया जाशी ?

तरुलता प्रसूनान्विता राहती रानी,

संपूर्ण भारिती वनश्रेणी गंधांनी,

ह्या प्रमदवनांतरि शिरले-जे जन,

तरुलताचि अंगे झाले-आपण,

निज नामरूपही गेले-विसरुन,

आनंदसमीरण डोल देतसे त्यांसी,

टपटपा पडति खालती लूट कुसुमांसी !


कवी - बी
कवितासंग्रह - फुलांची ओंजळ

कोणत्याही टिप्पण्‍या नाहीत:

टिप्पणी पोस्ट करा