कधी रे आता?

राजसा माझ्या
प्रीतीनंऽ येशील
मला तू हौशीनं घेशील
- कधी रे आता ?

अंगणी लावू
तुळशीच्या पंक्ती
सख्या रे! लावू शेवंती!
- कधी रे आता ?

पडावे राया
दो पैसे गाठी
निघावं बाजारासाठी!
- कधी रे आता ?

जरीची घ्यावी
तू साडी-चोळी
हसावी मी साधी भोळी!
- कधी रे आता ?

सराव्या केव्हा
या आटाआटी
रुसावंऽ मी गोफासाठी!
- कधी रे आता ?

भरावं राया
मी सारंऽ पाणी
हसावं मी राजसवाणी!
- कधी रे आता ?

अन निगोतीनं
फक्त तुझ्याखातर
सख्या मी भाजावी भाकर!
- कधी रे आता ?


कवी - ना. घ. देशपांडे
कवितासंग्रह - शीळ