साद ही नाही तुम्हाला

धुंद या वाणीत येते पाखरांची स्वैरता
साद ही नाही तुम्हाला, का तुम्ही वेडावतां?

मुग्ध संध्याराग माझा, अन उषा ही सावळी -
काय, हो, हातात येते तोलता ? ही अंधता

गूढ अव्यक्तात आहे चारुतेची चांदणी
चर्मचक्षुनी कुणाला काय येते पाहता?

अंतरी व्याकुळ होतो ऐकता आरोप हे
मर्मभेदी हे विषारी घाव का, हो, घालता?

‘हेच गा अन तेच गा ‘का घालता ही बंधने?
मोहना माझी आसवी ना कुणाची अंकिता

पूजितो निष्पाप माझी देवता प्रेमोज्ज्वला
दूर जा, मंदीरदारी पाप का हे ठेवता?

नेटकी विक्री कराया सज्जले भोंदू निराळे
मी असा हा प्रेमयोगी काय दावू दीनता?


कवी - ना. घ. देशपांडे
कवितासंग्रह - शीळ